11:16 - 14.10.2026

---

14 oktyabr, Fineko/abc.az. Azərbaycan Mərkəzi Bankının 2026-cı ilin birinci yarısı üzrə “Maliyyə Sabitliyi Hesabatı”na əsasən, ölkədə ipotekanın əlçatanlıq indeksi iyun ayında 121% təşkil edib.

Bu göstərici yaz aylarındakı yüksəlişdən sonra bir qədər azalsa da, 2025-ci ilin əvvəlindəki 100%-ə yaxın səviyyəsini xeyli üstələyir. İndeksin 121% olması adambaşına düşən aylıq sərəncamda qalan gəlirin orta aylıq ipoteka ödənişindən 21% çox olduğunu göstərir.

Təhlil olunan dövrdə yeni verilmiş ipoteka kreditləri üzrə faiz dərəcəsi 0,3 faiz bəndi artaraq 10,72%-ə, bankların daxili resursları hesabına verilən kreditlərin faizi isə 12,76%-ə yüksəlib.

İpoteka və Kredit Zəmanət Fondunun vəsaiti hesabına verilən kreditlər üzrə faiz göstəricisi isə 7,04% səviyyəsində sabit qalıb.

Paralel olaraq, mənzil qiymətlərinin illik 8,4% artmasına baxmayaraq, əhalinin sərəncamda qalan gəlirləri 10,5% çoxalaraq 2023-cü ilin sonundan bəri ilk dəfə mənzil qiymətlərinin artım tempini geridə qoyub.